ஆகாயத்தில்

அன்ன விரயம்

வெள்ளித் தட்டை

வீசியெறிந்து

விண் முற்றம் முழுதும்

வெண் சோற்றுப்

பருக்கைகள்

ஓ விண்மீன்கள் ..

          – அப்துல் கையூம்

தேன் நிலவு .. ..

தாம்பத்ய முகவுரை

இளமை சமர்ப்பணம்

காதற் பதிப்பு

கவர்ச்சி முகப்பு

அணிந்துரை இல்லா

கையடக்கப் பிரதி

அவள் … …

திறந்த புத்தகம்

இவன் … …

புத்தகப் புழு

          – அப்துல் கையூம்

போன்சாய் – ஒரு பார்வை

போன்சாய்.. ..                                                     
உளியை ஓரங்கட்டி
ஊசியினாலேயே                                               
உருவாகிய சிலை

பார்த்துவிட்டு                                                  
போட்டுவிட                                                      
பாக்கெட் நாவலா..?

“அசைபோட்டுப்                                            
பார்க்கிறேன்”     

மனதோடு                                                        
மல்யுத்தம் நடத்தும்                                             
வரிகளை                                                           
மீண்டும் மீண்டும்
அசை போட்டு                                             
பார்க்கிறேன்         

“தலைப்பின்றியே போகட்டும்                                         
என் கவிதை”                                          
கவிஞனுக்கேயுள்ள கர்வம்                                 
தன்னம்பிக்கையாய்

“உலகச் சந்தையில்                                             
இந்தியத் தோல்”                                                      
தாய் நாட்டைத் துறந்து                                            
வெளிநாட்டு மோகத்தில்                                     
அடிமையாகும்                                                      
சுதந்திர புருஷர்களுக்கு                                               
ஒரு குட்டு

“தாமரை இலை”                                                 
சாபமாய்ப் போன உறவு.                                         
பேதைப் பெண்களின்                                           
முரண்பாடு

“ஏவுகணை ஏலம்”                                                  
புத்தன் – காந்தியின்                                       
அஹிம்சையை                                                 
போதிக்கும்                                                      
தீவிரவாதி

“தேடலில்லா வாழ்க்கை                                           
தேறாத வாழ்க்கை”                                        
சிந்திக்காதவன்                                                 
வாழ்க்கை                                               
நிந்திக்கத்தக்கது                                                   
தீர்க்க தரிசனம்

“வரவேற்பறையில்                                                
கண்ணாடி கல்லறை”                                      
உயிரினங்களை                                          
கூண்டிலடைத்து                                             
ஆனந்தமடையும் மனிதன்                                              
அவன் தரும் பரிசு                                          
சித்திரவதை.

மைதாஸே..!                                                        
ஜன்னல் சிறைதனிலே                                        
வரதட்சணை ஓலம்                                                  
பாவம் முதிர்க்கன்னிகள்

“புதியதொரு நிறத்தைக்                                           
கண்டு பிடியுங்கள்”                                                 
வண்ண விளம்பரத்தால்                                
அரசியல்வாதிகளின் ஏலம்

“அழத்தொடங்கி”                                             
அழுகையை                                                
கேடயமாக்கும்
காரியவாதிகளுக்கு                                             
வாழ்க்கை உபதேசம்                                              
தத்துவ ஞானம்

படிமப் பாதையில்                                                    
தடம் புரளா                                                  
புதுக்கவிதை                                                         
பெட்டகம்

மனதோடு                                                        
மல்யுத்தம் நடத்தும்                                                                
வரிகளை                                                             
அசை போட்டுப்                                             
பார்க்கிறேன்

பாக்கெட் நாவலா                                                   
பார்த்துவிட்டு                                                      
போட்டு விட ?

வாசகனாய்                                                            
வலம் வந்தபோது                                              
இதயத்தில்                                                                
சிம்மாசனமிட்ட                                              
உணர்வுகளை                                                    
பரிமாறும்

அன்பன்                                                             
கவிஞர் ஷபி

அந்த நாள் ஞாபகம்

வாழ்த்துரை

அந்த நாள் ஞாபகம்
வாழ்த்துரை

இது ஒரு –
புதுவகைத் தலபுராணம்!

                 – டாக்டர் கவிஞர் ஈரோடு தமிழன்பன்

கவிஞர் நாகூர் அப்துல் கையூம் அவர்களுக்குப் பார்க்கின்ற கண்கள் இருக்கின்றன; பதிய வைத்துக் கொள்ளும் இதயம் இருக்கிறது; பாட்டாக எடுத்துச் சொல்லும் திறமையும் பழுத்திருக்கிறது. குலாம் காதிறு நாவலரின் கொள்ளுப் பேரன் என்று இவரைத் தமிழும் அணைத்துக் கொள்ளுகிறது.

இது ஒரு புதுவகைத் தலபுராணம். ஊரும், மக்களும், வாழ்வும், வரலாறும் பொய்முகம் காட்டாமல் நம்மை மெய்ச்சிலிர்க்க வைக்கிற விந்தை இதனுள் நிகழ்ந்துள்ளது.

உணவு வகை, உடை வகை, உறவு வகை, எல்லாம் தெள்ளிய தமிழ்நடையில் உலா வருவதோடு ஊரின் வரலாற்றில் ஒளிவிளக்குகளாய்ச் சுடர்விடும், புலவர்கள், புரவலர்கள், மருத்துவர்கள் முதல் அடையாளப்பட மாட்டோமா என ஏங்கும் எளிய நிலை மாந்தரும் சமநிலையில் சித்தரிக்கப்படுவதை இந்நூலின் தனிச்சிறப்பாக என்னால் எடுத்து மொழிய முடியும்.

நாகூர் மக்களுக்கே உரிய சொல்வழக்குகளும் உயிர்த் துடிப்போடு – இச்சிறுநூலைச் சிறந்த நூலாக்கி இயக்குகின்றன.

இந்நூலைப் படிக்கிறவர்களுக்கெல்லாம் ஆசை ஒன்று இப்படி அரும்பும் –

‘நம் ஊரையும் இப்படியொருவர் பாட்டில் படம் பிடிக்க மாட்டாரா?
நம் முகமும் இதில் இடம் பெறாதா ..?’

நல்வாழ்த்துக்களுடன்

தமிழன்பன் 

அரிமா நோக்கு – காலாண்டிதழ்   

அறிமுக உரை

மனதை மயக்கும் வெளிச்சப் புன்னகை !

நாகூர் – எங்கள் சம்பந்தக்குடி! பெண் கொடுத்தவர்கள், எடுத்தவர்கள்! சுகதுக்கங்களின் சரிபாதி சொந்தக்காரர்கள், நாங்கள்!

காரைக்கால் பிரஞ்சு யூனியன் பிரதேசமாக இருந்தபோது நாகூர் மாப்பிள்ளைமார்கள் கையில் கடவுச்சீட்டைப் பத்திரமாக வைத்திருந்து ஒவ்வொரு முறையும் பலத்த சோதனைக்குப் பிறகு நாடுவிட்டு நாடு பெயர்ந்து இல்லற வாழ்க்கை நடத்தியது, தனிக்கதை!

எப்போது நாகூர் கந்தூரி வந்தாலும் கொடியேற்றம் தொடங்கி பீரோட்டம் முடிய மச்சானின் பங்களா வீட்டில் கூடாரமிட்டு கும்மாளமிட்ட அந்த இனிய நாட்கள் அற்புதமானவை!

ஒவ்வொருவர் மனதிலும் புதைந்துக் கிடந்த ஈரநினைவுகளை ஒரு வெளிச்சப் புன்னகையாய் அள்ளி வந்துள்ளது கவிஞர் அப்துல் கையூமின் அந்த நாள் ஞாபகம்.

வாழ்வாதாரம் தேடி வளைகுடா ஓரம் ஒதுங்கினாலும் பாழும் மனது இறக்கை கட்டிப் பறந்து சொந்த ஊரின் சந்து பொந்துக்களில் நுழைந்து சுகம் அனுபவித்து தன்னிடம் இரகசியமாய் மொழிந்த அதிசயங்களை இந்நூல்வழி பகிரங்கப்படுத்தி மகிழ்கிறார், கவிஞர் நாகூர் அப்துல் கையூம்.

நபிகள் நாயகம் பிறந்த நன்னாளை ஊர் அழைத்து விருந்து வைத்து கொண்டாடி மகிழும் ஊர் நாகூர்!  நா விருந்தளிக்கும் நாகூரின் பெருமையை பாவிருந்தளித்துப் பரிமாறும் கவிஞரின் இதயவாசலில் வாழ்த்துப் பன்னீர்ச் செம்புடன் நான்!

முதலிரவு அறையின் மல்லிகை பூச்சரமும், ஊதுபத்தி மணமும் மட்டுமல்ல; வாழ்க்கைப் பாதையில் வழிநெடுக சந்தித்த அத்தனை அனுபவங்களும் அற்புதமானவை எனச் சத்திய வாக்குமூலம் அளிக்கின்றன, இவரது கவிச்சித்திரங்கள்!

ஒரு சின்னஞ்சிறிய அற்புத விளக்கில் எப்படி பூதத்தை அடைத்து வைத்தான் அலாவுதீன்? என்ற வினா இன்றுவரை என் மனதில் எழும்பிக் கொண்டு இருந்தது!  ஒரு கையடக்க புத்தகத்தில் ஒட்டுமொத்த நாகூரின் பாரம்பர்ய சிறப்புகளை பட்டியலிட்டுக் காட்டியுள்ள கவிஞர் அப்துல் கையூமின் கைவண்ணத்தைக் கண்ட பிறகு அலாவுதீனை நினைத்து இப்போது ஆச்சர்ய அலைகள் எழுவதில்லை!

அழகான பெண்ணொருத்தி சிரிக்கும்போது அவள் கன்னக்கதுப்பில் தோன்றும் ஒய்யாரக் குழியில் மனம் ஒட்டிக் கொள்வதைப் போன்று, சுனாமிகளால் சூறையாட முடியாத நாகூரின் பேரழகை காட்சிப்படுத்திக் காட்டும் ஒவ்வொரு வரியிலும் சிக்கிச் சிறைப்பட்டு நகர்ந்து வர முடியாமல் தவிக்கிறது இரசனை மிக்க உள்ளம்!

புலவர்க் கோட்டையெனப் போற்றப்படும் நாகூரின் பெருமையை மீண்டும் ஒருமுறை உறுதிப்படுத்த எழுதப்பட்டுள்ள மெய்ப்புச் சான்றிதழ் – இந்நூல்!

நாகூர் தர்காவுக்கு உண்டு அலங்கார வாசல்! ஒட்டுமொத்த நாகூரின் பேரழகை எழுத்துப் பூக்களால் சித்தரித்துக் காட்டும் இவரது பேனாவின் உயரம் கண்டு பிரமித்துப் போய் நிற்கிறது நாகூர் மனாரா!

உச்சி முதல் உள்ளங்கால் வரை ஒரு பெண்ணின் அழகைத்தான் புலவர்கள் இதுவரை வருணித்துள்ளனர். எல்லாத் திசைகளிலும் நிலைக் கண்ணாடிகள் வைத்து ஒரு மண்ணின் அழகைக் காட்சிப்படுத்திக் காட்டியுள்ள இந்தப் புதுக்கவிஞரின் ஆறாவது விரலை அலங்கரிக்க காத்திருக்கின்றன ஏராளமான கணையாழிகள்!
நல்வாழ்த்துக்களுடன்
ஹ.மு.நத்தர்சா

தமிழ்த்துறை,
புதுக்கல்லூரி
சென்னை – 14

(ஹ.மு. நத்தர்சா அவர்கள் புதுக்கல்லூரி தமிழ்த்துறைப் பேராசிரியர். படைப்பிலக்கியவாதி. மூன்று சிறுகதைத் தொகுப்புகள் வழங்கியுள்ளார். புதுவையரசின் 1996- ஆம் ஆண்டிற்கான கம்பன் புகழ்ப்பரிசு பெற்றவர். வரலாற்று ஆய்வுநூல் ஒன்றும் எழுதியுள்ளார். இந்திய பல்கலைக்கழகத் தமிழாசிரியர் மன்ற ஆய்வுக் கோவைகளில் இக்கால்  இலக்கியம், நாட்டுப்புற

இலக்கியம் குறித்து ஏராளமான ஆய்வுக்கட்டுரைகள் எழுதியுள்ளார். இஸ்லாமிய சிறுகதைகள் குறித்து ஆய்வு செய்து சென்னை பல்கலைக்கழகத்தில் முனைவர் பட்டம் பெற்றுள்ளார். இந்திய இலக்கியச் சிற்பிகளை அடையாளம் வண்ணம் சாகித்திய அகாதெமி வெளியீட்டு நூல்கள் வரிசையில் இறையருட் கவிமணி கா. அப்துல் கபூர் அவர்களை பற்றிய இவர் எழுதிய படைப்பும் இடம் பெற்றமை குறிப்பிடத்தக்கது.)

தொடர்பு முகவரி :

முனைவர் ஹ.மு. நத்தர்சா

(துணைப் பொதுச்செயலாளர், இஸ்லாமிய இலக்கியக் கழகம்)

தமிழ்த்துறை, புதுக்கல்லூரி,

இராயப்பேட்டை – சென்னை 600 014

அலைபேசி – 944176646